АММАҔА КУЛТУУРА УСТУДЬУОННАРА КЭНСИЭРИНЭН ОТЧУОТТААТЫЛАР


Амма улууһун хас да нэһилиэгэр Дьокуускайдааҕы култуура колледжын хореография уонна режиссура отделениеларын тоҕус устудьуона практикаларын бардылар. Мээндигэҕэ Анжелика Васильева олохтоохтору кытта кыттыгас кэнсиэринэн отчуоттаата.

Устудьуоннар практикалара Амма улууһугар тохсунньу 12 күнүттэн олунньу 8 күнүгэр диэри барда. Бу кэм устатыгар олохтоохтор биллэ сэргэхсийдилэр. Култуура эйгэтин баһылаары сылдьар оҕолор былаан быһыытынан араас омук үҥкүүтүн туруордулар.

Кырыс сир бөһүөлэгинэн биллэр Мээндиги нэһилиэгэр Чурапчыттан төрүттээх Анжелика Васильева отчуоттуур кэнсиэригэр олохтоохтор бары кэриэтэ кытыннылар. «Быйыл нэһилиэкпитигэр «Уопсастыбаннай түмсүүлэр Сылларынан» биллэрилиннэ. Сылбыт аһыллыыта биһиэхэ практикатын барбыт култуура колледжын 3-с куурсун устудьуонката Анжелика Васильева үлэтин түмүгүн көрдөрөр кэнсиэрин кытта сөп түбэһиннэрдибит. Оскуола оҕолоро, ыччат, ийэлэр түмсүүлэрэ кыттыылаах улахан үҥкүү киэһэтэ буолла. Бары наһаа астынныбыт, дуоһуйдубут. Анжелика үҥкүүгэ олохтоохтору барытын кэриэтэ кытыннарда. Саха, нуучча, еврей, грузин омук дьонун үҥкүүлэрэ турдулар. Үлэһит, дьаныардаах, эппиэтинэстээх кыыс эбит диэн наһаа астынныбыт. Түмсүүлэрбит таҥас бөҕө тигиннилэр, барыта саҥалыы«, — диэн нэһилиэк баһылыгын солбуйааччы Альбина Филиппова устудьуон үлэтиттэн астыммытын этэр.

Түмүктүүр кэнсиэри көрбүт улуустааҕы култуура управлениетын исписэлиистэрэ нэһилиэнньэ көхтөөх кыттыытын бэлиэтээтилэр, устудьуон дьону-сэргэни кыратыттан кырдьаҕаһыгар диэри үҥкүүгэ кытыннарбытын хайҕаатылар.

Ааптар: Наталья Бубякина

ССЫЛКА: http://ulus.media/2019/02/08/amma-a-kultuura-ustuduonnara-kensierinen-otchuottaatylar/



 
Якутский колледж культуры и искусств, г.Якутск, ул. Халтурина, 14/5. Телефоны: (4112) 40-27-42, 40-27-41

                    

 
разработка сайта: ООО Эйфос, информационные технологии