Ыам ыйын 22 күнэ сахаларга улахан суолталаах. Бу күнү сахалар уһун кыыдааннаах кыстыгы этэҥҥэ туораан, саҥа дьылы кɵрсɵр, сайыны уруйдуур күнүнэн ааҕаллар. Саха Өрɵспүүбүлүкэтин Ил Дархана Айсен Сергеевич Николаев уурааҕынан ыам ыйын 22 күнэ Сайылык күнүнэн биллэриллибитэ.

Үɵрүүлээх самаан сайын салаллан кэлэр саргылаах күнүгэр, от-мас тыллыыта, хатыҥ сэбирдэҕэ собо тылын саҕа буолуута, айыылар, иччилэр саамай кэтэспит сылаанньыйбыт кэмнэригэр, үгэс быһыытынан алгыс тылларын эттибит, түптэ буруотун унаарыттыбыт, ас амтаннааҕын астаатыбыт, салама бастыҥын ыйаатыбыт. Тэрээһини тɵрүт култуура салаатын 3 кууруһун устудьуоннара иилээн-саҕалаан ыыттылар.

Дьокуускайдааҕы култуура уонна ускуустуба кэллиэhин дириэктэрин солбуйааччы Захаров Андрей Вадимович сайын кэлбитинэн эҕэрдэлээтэ, сахалар айылҕа кɵстүүлэрин кытта сибээстээх билгэлэрин билиһиннэрдэ, быйылгы үɵрэҕи түмүктээччилэргэ инники билиилэрин тургутан кɵрɵр государственнай экзаменнарга  ситиһиилэри баҕарда.

Самаан сайыны кɵрсүү чэрчитинэн тɵрүт култуура салаатын 4 кууруһун устудьуона Лена Захарова дипломнай үлэтин практическай чааһын – «Күɵххэ үктэнии» оһуохай күрэҕин ыытта. Күрэххэ кыттыыны ыллылар: «Фото-видео творчество» салаатын 2 кууруһун устудьуона Анна Захарова (3 үрдэл); «Социально-культурная деятельность» салаатын 3 кууруһун устудьуона Святослав Лебедев (2 үрдэл); «Театральное творчество» салаатын 1 кууруһун устудьуона Мария Давыдова (1 үрдэл). Күрэх кыттыылаахтара сыаналаах бириистэринэн наҕараадаланнылар.

Самаан сайыны кɵрсɵр бэлиэ күммүтүгэр илгэлээх ардах таммалаан, мустубут дьоҥҥо үтүɵнү, уйгуну, дьолу түстээтэ.