Дьокуускайдааҕы культура уонна искусство колледжын эстрада салаатын 1998 с. выпускнига, Эстрада театрын талааннаах артыыһа,   СР культуратын үтүөлээх үлэһитэ Еремеев Василий Васильевич Бүлүү оройуонун Тыымпы орто оскуолатын ситиһиилээхтик бүтэрэн баран 1995 сыллаахха биһиги колледжпытыгар үөрэнэ киирбитэ. Кини эстрада салаатыгар үөрэнэ сылдьан Светлана уонна Егор Неустроевтар тэрийбит «Бабочкалаах уолаттар» ансаамбылларын кыттыылааҕа этэ. Үөрэммит сылларыгар бастакы «Кэҕэ» диэн ырыатын суруйбута. Ырыа дьон-сэргэ киэҥ сэҥээриитин ылбыта. С. Капитонов тылларыгар  уонна уһуйааччыта Е.И. Неустроев музыкатыгар «Уол ырыата» ырыанан артыыс быһыытынан норуокка киэҥник биллибитэ.

Васябыт үөрэхпит кыһатын араас тэрээһиннэригэр көхтөөхтүк  кыттара. «Эдэр саас» хаһыат күннэрин чэрчитинэн республикабыт араас улуустарыгар тиийтэлээн ыллаан-туойан кэрэ куолаһынан көрөөччү билиниитин ылбыта. Айар үлэтин таһынан спордунан утумнаахтык дьарыктанан күрэхтэргэ ситииһиилээхтик кыттара, бириистээх миэстэттэн түспэт этэ. Студенныы сылдьан цирковой салаа биир кэрэ-мааны кыыһын Марианнаны көрсөн, таптал дьолун билэн ыал буолбуттара.

1998 сыллаахха үөрэммит кыһатын ситиһиилээхтик бүтэрэн «Туймаада» государственнай ырыа ансаамбылыгар, ол кэннэ Ю.Е. Платонов аатынан эстрада театрын артыыһынан үлэлээбитэ.

Күндү Васябыт бу орто дойдуттан күрэммитинэн дьиэ кэргэнигэр, чугас дьонугар, доҕотторугар дириҥ кутурҕаммытын тиэрдэбит. Кини туһунан сырдык өйдөбүл биһиги сүрэхпитигэр сылаастык сөҥөн хаалыаҕа.

Дьокуускайдааҕы А.Д. Макарова аатынан культура уонна искусство колледжын коллектива