А.Д. Макарова аатынан култуура уонна урамньы кэллиэһин төрүт култуура салаатын устудьуоннара «Куйуур олоңхото-2026» өрөспүүбүлүкэтээҕи бэстибээлгэ ситиһиилээхтик кыттан кэллиллэр.

Муус устар 3-4 күннэригэр Кэбээйи улууһун Сииттэ нэһилиэгэр «Куйуур олоҥхото-2026» өрөспүүбүлүкэтээҕи бэстибээл буолан ааста. Быйылгы бэстибээл Кэбээйи улууһун I Лүүчүн нэһилиэгин олоҥхоһута Иван Афанасьевич Николаев-Куоҕас Уйбаан төрөөбүтэ 115 сылыгар ананна. Тэрээһин олоҥхоһут албан аатын, кэрэмэс кэриэһин кэлэр көлүөнэ ыччакка үйэлэргэ үйэтитээри, ону тэҥэ  Кэбээйи улууһун дьонугар-сэргэтигэр олоҥхону истии култууратын сайыннарыыга үлэни хаҥатар сыаллаах-соруктаах ыытылынна.

Бэстибээлгэ өрөспүүбүлүкэ араас муннуктарыттан, ону таһынан АГКуоУУ уонна А.Д. Макарова аатынан ДьКуоУК устудьуоннара, ыччат дьон уран тылларын, кылыгырас кылыһахтарын, олоҥхолорун толорон иһитиннэрдилэр. Дьүүллүүр сүбэҕэ «Ыччат олоҥхоһут» өрөспүүбүлүкэтээҕи общественнай түмсүү ытык сүбэтин салайааччыта, «Куйуур олоҥхото» бырайыак ааптара, педагогическай билим хандьыдаата, ХИФУ  «Культурология» хаапыдыратын доцена Г.С. Попова-Санаайа, СӨ Дархан оһуохайдьыта, СӨ Ил Дарханын олоҥхоҕо стипендиата, СӨ култууратын туйгуна, Г.Г. Колесов аатынан анал аат хаһаайына, Олоҥхо Ыһыахтарын хас даҕаны төгүллээх Кылаан кыайыылааҕа, олоҥхону толорооччу В.В. Никифоров, Г.Г. Колесов аат. Мэҥэ Хаҥалас улууһун Олоҥхо Дьиэтин фольклорга специалиһа, СӨ култууратын туйгуна, олоҥхоһут Н.И. Степанов-Ноорой сиэнэ, 2013 с., 2018 с. Олоҥхо ыһыахтарын Кылаан кыайыылааҕа, күөх экран нөҥүө ыытыллар «Олоҥхо баттл-2024» күөн күрэс кыайыылааҕа, олоҥхону толорооччу А.Н. Степанова үлэлээтилэр.

Үгэс быһыытынан бэстибээл иккис күнүгэр олоңхобут куйуура буолан ааста. Сиэр-туом ыытыллынна, алгыс этилиннэ, көрдөөх сахалыы оонньуулар оонньоннулар.

«Куйуур олоңхото-2026» бэстибээл түмүгүнэн биһиги үөрэхпит кыһатын төрүт култуура салаатын 3 кууруһун устудьуоннара Константинова Милена lll миэстэ , Константинова Анита «Хомоҕой тыллаах олоҥхоһут», Попова Виктория «Кэскиллээх олоҥхоһут» анал ааттары ыллылар, сыаналаах бириистэринэн наҕараадаланнылар.

Маннык күрэхтэр ыччат дьон  сатабылларын кɵрдɵрɵр, айар-тутар кыахтарын арыйар кыаҕы биэрэллэр, инникигэ кынаттыыр күүстээх тирэх буолаллар.

Устудьуоннарбытын уонна кинилэр уһуйааччыларын С.В. Харитонованы ситиһиилэринэн эҕэрдэлиибит!