Сэтинньи ый 30 күнүгэр А.Д. Макарова аатынан Дьокуускайдааҕы культура уонна искусство колледжын «Төрүт культура» салаатын IV-с кууруһун устудьуона Анжела Леонтьева «Таастаах Дьааҥы быстыбат ситимэ» диэн Олоҥхо декадатын күнүгэр аналлаах дипломнай үлэтэ ZOOM платформаҕа буолан ааста.

Тэрээһиммит бастакы ыҥырылаах ыалдьытынан Олоҥхо театрын иһинэн научнай методическай киинин  фольклорга специалиһа, СР культуратын үтүөлээх үлэһитэ Сысолятина Зоя Григорьевна буолла. Кини киирии эҕэрдэ тылынан тэрээһиммит өрө көтөҕүүлээхтик саҕаламмыта.

Дьааҥы олонхотун уонна Дьааҥы олоҥхоһуттарын айымньыны толорууга үгэс буолбут ньымаларын туһунан фольклорист, филологическай наука доктора, М.К. Аммосов аатынан Хотугулуу Илиҥҥи норуоттар тылларын уонна культураларын институтун профессора Василий Васильевич Илларионов сиһилии кэпсээнэ истээччилэри сэргэхситтэ.

Өр кэмҥэ Дьааҥы олонхоһуттарын  олохторун, айар үлэлэрин чинчийбит-үөрэппит РФ норуотун үөрэҕириитин туйгуна, РФ үөрэҕириитин бочуоттаах үлэһитэ, СР үтүөлээх учуутала, «Гражданскай килбиэн» уонна «Бастыҥ олонхону тарҕатааччы» бэлиэлээх Ия Ильинична Стручкова иһитиннэриитэ олус умсугтта. Ия Ильинична Дьааны олоҥхоһуттарын чинчийэр үлэтин билигин даҕаны тиһигин быспакка олорор эбит. Ол чинчийэр үлэтин түмүгүнэн барыта Дьааҥыга 100 олоҥхоһут олорон ааспыт диэн иһитиннэрии оҥордо.

Дьааҥы олоҥхотун үөрэтии, чинчийии түмүгүнэн  бэчээттэнэн тахсыбыт үлэлэр, кинигэлэр тустарынан устудьуоннарга колледж библиотекатын үлэһитэ Диана Лесбековна Иванова  кэпсээтэ.

Тэрээһиҥҥэ Арктикатааҕы культура уонна искусство судаарыстаннай институтун норуот уус-уран культуратын кафедратын устудьуона Варвара Ефимова ийэ олоҥхоһут Дарья Томская «Үчүгэй Үөдьүйээн уонна Куһаҕан Хоодьугур» олоҥхотуттан быһа тардан ааҕан, тэрээһиммит силигин ситэрдэ.

Олоҥхону сайыннарыыга, дьоҥҥо-сэргэҕэ тарҕатыыга, киэҥ араҥаҕа таһаарыыга биир сүрүн үлэни Олонхо театра 2008 сылтан арыллан үлэлии турар. Дьааҥы улууһуттан төрүттээх Олоҥхо театрын артыыһа Павел Афанасьевич Колесов дорҕоонноох тойугунан Олоҥхоҕо аналлаах тэрээһиммитин түмүктээтэ.

Олоҥхо күнүгэр аналлаах тэрээһиммит ыалдьыттарыгар барҕа махталбытын тиэрдэбит. Норуоппут уус-уран улуу айымньытын үтүөтүн  маннык тылларынан бэлиэтээн түмүктүөҕүҥӨ.

Саллар саас тухары Олоҥхо

Саханы Саха дэттэриэ!

Кэс тылбыт кэскилин көрдөрүө,

Кэхтибэт кэрэтин сөхтөрүө!

Төрүт культура салаата