Олунньу 14-15 күннэригэр Бүлүү куоракка III Республикатааҕы «Кыайыы суолунан…» хоровой ассамблея буолан ааста. Тэрээhини А. Д. Макарова аатынан Дьокуускайдааҕы култуура уонна искусство колледжын «Хору салайыы» салаа уhуйааччылара Егорова Л.В., Андросова М.Н., Новгородова Н.Н., производственнай практика куратора Гоголева Ф.Т. уонна  Бүлүүтээҕи култуура, эдэр ыччат уонна дьиэ кэргэн салалтата ыыттылар. Ассамблея сыалынан-соругунан Бүлүү бөлөх оройуоннарыгар саҥа саҕалаан эрэр ырыа коллективтарын өйөөһүн уонна профориентационнай үлэни ыытыы буолла.

Манна хорунан ырыа курэхтэрэ, салайааччыларга квалификацияны үрдэтэр куурус уонна В. Васильев салайар хора 10 сыллаах үбүлүөйүн бэлиэтиир айар кэнсиэр ыытылыннылар. Күрэххэ барыта 144 киhи,  олор истэригэр уонтан тахса хорунан ыллыыр улахан дьон бөлөхтөрө, уонна үс оҕо хора кыттыыны ылла.

Бары кыттааччылары М.Н. Жирков аатынан Бүлүүтээҕи оҕо искусствоҕа кыhатын дириэктэрэ А.А. Николаева истиҥник көрсөн ассамблея үлэтэ  үрдүк таhымнаахтык ааста.

Хоровой бөлөхтөр күрэхтэригэр I истиэпэннээх диплому В.В. Васильев салайааччылаах Бүлүү аҕам саастаах дьоннорун хора ылла. II истиэпэннээх дипломунан 1 нүөмэрдээх алын сүhүөх оскуола 1 «б» кылааһын  «Мичээр» хора (салайааччы Говорова И.А., кылаас салайааччыта Константинова Н.И.), III истиэпэннээх дипломунан «Тойоку» хоровой бөлөх бэлиэтэннэ (Үөhээ Бүлүү Өргүөт нэhилиэгэ, салайааччы Прокопьева Д.Д.).

«Вокальнай ансамбль» номинацияҕа I истиэпэннээх диплому П.Н. Тобуруокап аатынан Үөhээ Бүлүүтээҕи норуот айымньытын дьиэтин «Ситим» эр дьон ансаамбыла (салайааччы Д.Д. Дьячковскай) тутта. II истиэпэннээх дипломунан «Надежда» дьахталлар ансаамбыллара (Кыhыл Сыыр, Бүлүү улууhа, салайааччы Семенова С.Г.) бэлиэтэннэ. III истиэпэннээх диплом «Күбэйэ» дьахталлар ансаамбылыгар (Үгүлээт нэhилиэгэ, Үөhээ Бүлүү, салайааччылар Афанасьева П.Д., Яковлева Р.И.) ананна.

Бары кыттыыны ылбыт хор коллективтарыгар, ансаамбыл салайааччыларыгар улахан махталбытын тиэрдэбит. Ырыа абылаҥнаах дорҕоонугар уйдаран өссө даҕаны элбэх тэрээhиннэргэ ситиhиилэри, тус олоххутугар дьолу-соргуну баҕарабыт!

Хору салайыы салаатын уһуйааччылара